autor: Fojerman
http://www.fojerman.pl
Na modła "Jożin'a z bażin"
We kurniku straszny prask,
niy wiym, co sie dzieje,
kurów niyma, prózny plac,
a kokot sztyjc pieje.
Kożdo kura już kalup gno,
kokot dostoł chynci,
kożdo piyrszo chce był, bo
wiedzóm, co sie świynci.
Kura marzi, żeby było miło,
Kura marzi, żeby sie spełniło,
Kura marzi, o tym, co to byndzie,
Jak jóm kokot dopadnie na grzyndzie.
Do tych kurzich marzyń dociepnyć trza nóm to:
Żeby z tego było chocioż jaki jajco.
Czeko kurnik cały już
na kokota w rzyndzie,
yno kury bojóm sie,
czy mu chynć niy przyndzie.
Kożdo kura chce być bliży,
na poczóntku w raji,
tóż sie wszystki cisnóm i
dochodzi do haji.
Kura marzi, żeby było miło,
Kura marzi, żeby sie spełniło,
Kura marzi, o tym, co to byndzie,
Jak jóm kokot dopadnie na grzyndzie.
Do tych kurzich marzyń dociepnyć trza nóm to:
Żeby z tego było chocioż jaki jajco.
Poprzoł kokot kuróm piynć,
wiyncy niy doł rady,
na amory przeszła chynć,
w kurniku durch swady.
Wszystki kury, zawiedzióne,
dziubióm sie na grzyndzie,
kokot zapioł i polecioł,
wiyncy już niy byndzie.
Kura marzi, żeby było miło,
Kura marzi, żeby sie spełniło,
Kura marzi, o tym, co to byndzie,
Jak jóm kokot dopadnie na grzyndzie.
Chcesz kokota trefić, to musisz z przodku stoć,
Jak żeś je ze zadku, to mosz dycko psińco.