Podug Brzechwowego wiersza napisoł B.Kallus
Wybiyrŏ sie sojka za morze,
Ale wybrał sie niy może.
„Piyknie je na Ślōnsku bawić,
A jŏ muszã go ôstawić.”
Pofurgała ku Beskidōm
Wyjzdrzeć, jak gyszefty idōm.
Nawiedziyła nojprzōd Brynek,
Bo tam miyszkoł jeji synek,
W Strzelcach boła dziōnek cały,
Bo jōm durch drzimoły brały.
Nockã zbyła w Kōniakowie,
Gaździe bamōnciła w gowie.
Chybła pode Kluczbork prawie,
By wypultać sie w Stobrawie.
A z Kluczborka do Kokotka,
Kaj miyszkała jeji ciotka.
A ôd ciotki drap do ōmy,
W Mikołowie jejś makrōny,
Potym matkã, ôjca, syna
I kuzyna z Gogolina.
Pożegnała familijõ,
A tu zatym roczek mijŏ.
Zajś wybiyrŏ sie za morze,
Ale wybrał sie nie może.
Posiedziała w Raciborzu,
Nawiedziyła miasto Chorzōw,
Z wiyrchu widzi Krapkowice,
Rudã, Bytōm, Mysłowice,
Potym jeszcze hań na dole,
Ôbejzdrzała se Ôpole:
Wieżõ Piastōw, ratusz prosty,
Piykne place, drōgi, mosty.
Blikła z dala na Ôleszno
Aż sie jyj zrobiyło teschno.
Poleciała nad Lyndziny,
Przemarniyła trzi godziny,
Do Cieszyna sie uwijŏ,
A tu trzeci roczek mijŏ.
Zajś wybiyrŏ sie za morze,
Ale wybrał sie nie może.
„Furgać do Katowic muszã,
Zaczym w dalszõ drōgã ruszã,
Ôbsztalować gibko wizy,
Kupić kofry i walizy.”
Ale kajś to w Tychach było,
Jak sie jyj zajś żol zrobiyło.
„Tōż Katowic drapko przecã,
Z kamratkami niy ôblecã!”
Zbyła dziōnek, tydziyń cały,
Miesiōnc, kwartał, trzi kwartały,
Kej już roczek zwiekowała,
Antlich tak medykowała:
„Wybrać sie wielŏ biyda,
Beztōż sam we Ślōnsku bydã.”